NCERT LOCAL LANGUAGE SYLLABUS: मातृभाषेत घेता येणार पूर्व प्राथमिक शिक्षण... NCERT कडून ५४ स्थानिक भाषेतील अभ्यासक्रम जाहीर

NCERT local language syllabus: २०२० मध्ये जारी झालेल्या नव्या राष्ट्रीय शैक्षणिक धोरणामुळे देशातील शिक्षण पद्धतीत शासनाद्वारे अनेक बदल करण्यात आले. NEP (National Education Policy) द्वारे करण्यात आलेला एक मोठा आणि महत्त्वाचा बदल म्हणजे या अंतर्गत स्थानिक भाषेतील किंवा मातृभाषेतील शिक्षणाला अधिक महत्व देण्यात आले आहे. याच संदर्भात नुकतीच एनसीईआरटीने एक मोठी घोषणा केली आहे. 'एनसीईआरटी' (National Council of Educational Research and Training) द्वारे देशभरातील एकूण ५४ स्थानिक भाषांमध्ये अभ्यासक्रम तयार करून पब्लिश करण्यात आले आहेत.

पूर्व प्राथमिक ते इयत्ता दुसरीपर्यंतचे हे अभ्यासक्रम आहेत. म्हणजेच ३ ते ८ वयोगटातील विद्यार्थ्यांना प्रादेशिक भाषेत शिक्षण घेता येणार आहे. आदिवासी भागातील विद्यार्थ्यांना इतर भाषेतील शिक्षण पद्धती समजण्यास अवघड जात असून त्याचा परिणाम त्यांच्या शैक्षणिक प्रगतीवर होत असल्याचे प्रकर्षाने दिसून आले. म्हणूनच केंद्र सरकारने NEP अंतर्गत ३ ते ८ वयोगटातील विद्यार्थ्यांना दिले जाणारे प्राथमिक स्वरूपातील मूलभूत शिक्षण स्थानिक भाषेत देण्याचा महत्त्वाचा निर्णय घेतला आहे.

विशेष म्हणजे, याचाच परिणाम म्हणून या अभ्यासक्रमांमध्ये मराठी भाषेबरोबरंच खान्देशी भाषेचाही समावेश करण्यात आला आहे. याद्वारे विद्यार्थ्यांना खान्देशी भाषेत शब्द, उच्चार, वाचन, वर्णमाला तसेच लेखन कौशल्य शिकवले जाणार आहे. मातृभाषेत उपलब्ध असलेली अक्षरे आणि मातृभाषेत नसलेली मराठी अक्षरे एकत्र करून 'खान्देशी भाषा शिक्षण प्रवेशिका' हे पाठ्यपुस्तक तयार करण्यात आले आहे.

या स्थानिक भाषेतील अभ्यासक्रमात, स्थानिक लोकगीते तसेच विविध कथांमधून बोलीभाषा विकसित करण्यावर भर दिला जाणार आहे. पाठ्य-पुस्तकातील गोष्टी, चित्रे, संवाद याद्वारे हे केले जाणार आहे. वाचन आणि लेखनाची सवय लावण्यासाठी, खान्देशी भाषेतील शब्द, गाणी देण्यात आली आहेत. जेणेकरून विद्यार्थ्यांना आपल्या मातृभाषेतून ध्वनि आणि लिपी शिकणे अधिक सोपे आणि सहज शक्य होईल. NEP अंतर्गत झालेल्या या बदलांमुळे विद्यार्थ्यांना मोठा फायदा होणार आहे. विद्यार्थ्यांच्या शालेय प्रगतीत आणि कौशल्यपूर्ण विकासावर याचा नक्कीच चांगला परिणाम होईल.

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-20T09:35:57Z dg43tfdfdgfd