RAHUL GANDHI NEW HOME: विरोधी पक्षनेते राहुल गांधी यांना ‘५ सुनेहरी बाग’चा प्रस्ताव; '१० जनपथ' सोडणार का?
वृत्तसंस्था, नवी दिल्ली
लोकसभेच्या गृहनिर्माण समितीने सभागृहातील विरोधी पक्षनेते राहुल गांधी यांना त्यांच्या निवासस्थानासाठी ‘५ सुनेहरी बाग’ या बंगल्याचा प्रस्ताव दिला आहे. गृहनिर्माण समितीशी संबंधित सूत्रांनी ही माहिती दिली आहे. राहुल गांधींशी संबंधित सूत्रांनीही याला दुजोरा दिला आहे.
राहुल गांधी यांची संमती मिळाल्यानंतर हे त्यांचे नवीन घर असेल, असे सूत्रांनी सांगितले. काँग्रेस सरचिटणीस आणि राहुल गांधी यांची बहीण प्रियंका गांधी-वड्रा शुक्रवारी ‘५ सुनेहरी बाग’ येथे पोहोचल्या होत्या. हा ‘टाइप ८’ श्रेणीचा बंगला आहे. तो सामान्यतः कॅबिनेट मंत्र्यांना दिला जातो.
राहुल गांधी अनेक वर्षे ‘१२ तुघलक लेन’मध्ये राहत होते. पण, गेल्या वर्षी मानहानीच्या खटल्यात गुजरातमधील कनिष्ठ न्यायालयाने दोषी ठरवल्याने सदस्यत्व गमावल्यानंतर त्यांनी ते घर सोडले. तेव्हापासून ते त्यांच्या मातोश्री आणि काँग्रेस संसदीय पक्षाच्या प्रमुख सोनिया गांधी यांच्या ‘१० जनपथ’ या निवासस्थानी राहतात.
काँग्रेसचे माजी अध्यक्ष यावेळी रायबरेलीमधून निवडून आले असून, ते विरोधी पक्षनेतेपदाची जबाबदारी पार पाडत आहेत. लोकसभा निवडणुकीत राहुल गांधी यांनी केरळमधील वायनाड आणि उत्तर प्रदेशमधील रायबरेली अशा दोन मतदारसंघातून निवडणूक लढवली होती आणि या दोन्ही मतदारसंघातून त्यांनी विजय मिळवला होता. त्यानंतर त्यांनी वायनाडचा राजीनामा देत रायबरेलीचे प्रतिनिधित्व करण्याचे ठरवले होते.
मानहानीच्या खटल्यात सुलतानपूर न्यायालयात हजर
सुलतानपूर (उत्तर प्रदेश) : लोकसभेतील विरोधी पक्षनेते राहुल गांधी मानहानीच्या खटल्यात शुक्रवारी सुलतानपूर एमपी-एमएलए न्यायालयात हजर झाले आणि त्यांनी आपले म्हणणे नोंदवले. ‘माझ्याविरोधात न्यायालयात दाखल करण्यात आलेला खटला हा सवंग प्रसिद्धीसाठी करण्यात आला आहे. आजपर्यंत कोणाच्याही विरोधात आपण मानहानीचा गुन्हा दाखल होऊ शकेल असे वक्तव्य केलेले नाही,’ असे त्यांनी न्यायालयात सांगितले. त्यानंतर न्यायालयाने या प्रकरणाची पुढील सुनावणी १२ ऑगस्ट रोजी ठेवली.
चर्मकाराशी संवाद
न्यायालयातून लखनऊला परतत असताना, राहुल गांधी सुलतानपूरच्या आमदारनगरमध्ये एका चर्मकाराच्या दुकानात थांबले. दुकानात चर्मकाराजवळ बसून त्याच्याशी चपला बनवण्याविषयी आणि त्याच्या आयुष्यातील समस्या त्यांनी जाणून घेतल्या.