BANK HOLIDAY ON VOTING DAY: लोकसभा निवडणुकीच्या पहिल्या टप्प्यात आज मतदान, बँका बंद आहेत का?

Bank Holiday on voting Day : लोकसभा निवडणूक 2024 च्या पहिल्या टप्प्यात आज मतदान होत आहे. या पहिल्या टप्प्यात देशातील 21 राज्ये आणि केंद्रशासित प्रदेशांमधील एकूण 102 जागांवर मतदान प्रक्रिया पार पडणार आहे. यात महाराष्ट्रातील विदर्भातील रामटेक, नागपूर, भंडारा-गोंदिया, गडचिरोली-चिमूर आणि चंद्रपूर या पाच लोकसभा मतदारसंघांचा यात समावेश आहे. सकाळी 7 वाजेपासून मतदान सुरू होत सायंकाळी 6 वाजेपर्यंत मतदान प्रक्रिया चालणार आहे.मतदानामुळे बँका बंद आहेत का? असा प्रश्न नागरिकांना पडला आहे.

देशभरातील 21 राज्ये आणि केंद्रशासित प्रदेशांमधील एकूण 102 जागांवर आज, पहिल्या टप्प्यात 19 एप्रिल रोजी मतदान प्रक्रिया पार पडणार आहे. भारतीय रिझर्व्ह बँकेच्या हॉलिडे कॅलेंडरनुसार, आगरतळा, आयझोल, चेन्नई, डेहराडून, इंफाळ, इटानगर, जयपूर, कोहिमा, नागपूर आणि शिलॉन्ग येथील सार्वजनिक आणि खासगी क्षेत्रातील बँका 19 एप्रिल रोजी सार्वत्रिक निवडणुकांमुळे बंद राहतील.

ऑनलाइन बँकिंगवर कोणताही परिणाम नाही

लोकसभा निवडणुकीसाठी आज पहिल्या टप्प्यात मतदान होत आहे. मतदान होत असलेल्या मतदारसंघात बँका बंद राहतील. मात्र,ऑनलाइन बँकिंग सेवा सुरू राहणार आहे. ग्राहक त्यांचे आवश्यक व्यवहार त्यांच्या बँकेच्या वेबसाइट, मोबाइल ॲप किंवा एटीएमद्वारे पूर्ण करू शकतात. ऑनलाइन बँकिंगवर कोणताही परिणाम नाही, असे सूचित करण्यात आले आहे.

आज कोण कोणत्या राज्यात मतदान?

लोकसभा निवडणुकीच्या सात पैकी पहिल्या टप्प्यात आज मतदान होत आहे. अरुणाचल प्रदेश (2 जागा), आसाम (5 जागा), बिहार (4 जागा), छत्तीसगड (1 जागा), मध्य प्रदेश (6 जागा), महाराष्ट्र (5 जागा) यांचा समावेश आहे. तर मणिपूर (2 जागा), मेघालय (2), मिझोराम (1 जागा), नागालँड (1 जागा), राजस्थान (12 जागा), सिक्कीम (1 जागा), तामिळनाडू (39 जागा), त्रिपुरा (1 जागा), उत्तर प्रदेश (उत्तराखंड (5 जागा), पश्चिम बंगाल (3 जागा), अंदमान आणि निकोबार (1 जागा), जम्मू आणि काश्मीर (1 जागा), लक्षद्वीप (1 जागा) आणि पुद्दुत्चेरी (1 जागा) मतदान होत आहे.

8 केंद्रीय मंत्र्यांचे भवितव्य ईव्हीएममध्ये बंद होणार

लोकससभेच्या या पहिल्या टप्प्यातील निवडणूकीसाठी 8 केंद्रीय मंत्री निवडणुकीच्या रिंगणात आहे. यात केंद्रीय रस्ते वाहतूक मंत्री नितीन गडकरी यांचा समावेश आहे. नितीन गडकरी हे महाराष्ट्रातील नागपूर मतदारसंघातून निवडणूक लढवत आहेत. यासह केंद्रीय पृथ्वी विज्ञान आणि अन्न प्रक्रिया उद्योग मंत्री किरेन रिजिजू हे अरुणाचल पश्चिम मतदारसंघातून निवडणूक लढवत आहेत.

मत्स्यव्यवसाय, पशुवैद्यकीय आणि दुग्ध मंत्रालयाचे राज्यमंत्री डॉ.संजीव बल्यान मुझफ्फरनगर मतदारसंघातून निवडणूक लढवत आहेत. केंद्रीय बंदरे, जहाजबांधणी आणि जलमार्ग, आयुष मंत्री सर्बानंद सोनेवाल आसाममधील दिब्रुगड लोकसभा मतदारसंघातून,राज्यमंत्री डॉ.जितेंद्र सिंह जम्मू-काश्मीरमधील उधमपूर-कठुआ-डोडा मतदारसंघातून, पर्यावरण, वन आणि हवामान बदल मंत्री भूपेंद्र यादव राजस्थानमधील अलवर मतदारसंघातून, कायदा मंत्री अर्जुन राम मेघवाल राजस्थानमधील बिकानेर लोकसभा मतदारसंघातून, माहिती आणि प्रसारण मंत्रालयात राज्यमंत्री एल. मुरुगन हे तामिळनाडूतील निलगिरीतून लोकसभेची निवडणूक लढवत आहे.

2024-04-19T04:55:11Z dg43tfdfdgfd