CRIME NEWS: नवी मुंबईत 22 वर्षीय तरुणीची बॉयफ्रेंडकडून हत्या, चाकूने वार करत मृतदेह फेकला झाडीत

Navi Mumbai Crime News: नवी मुंबईजवळील उरण परिसरात एक धक्कादायक घटना घडली आहे. उरण - पनवेल मार्गावर शनिवारी (27 जुलै) एका 22 वर्षांच्या तरुणीचा मृतदेह आढळला आहे. यशश्री शिंदे असं या तरुणीचं नाव आहे. या तरुणीच्या छातीवर आणि अंगावर जखमा आढळून आल्या आहेत. तसेच तिचे काही अवयव कापण्यात आल्याचीही माहिती मिळाली आहे. या तरुणीची बॉयफ्रेंडने हत्या केल्याचा संशय व्यक्त करण्यात आला आहे. या घटनेमुळे परिसरात खळबळ उडाली आहे. (22 year old girl of uran murdered on uran panvel highway)

नेमकं प्रकरण काय ?

पोलिसांनी यशश्रीच मृतदेह पोस्टमार्टमसाठी उरणमधील सरकारी रुग्णालयात पाठवला आहे. मिळालेल्या माहितीनुसार, यशश्री शिंदे गेल्या दोन दिवसांपासून बेपत्ता होती. तिच्यासोबत तिचा बॉयफ्रेंडदेखील गायब झाला होता. यशश्री बेपत्ता असल्याची तक्रार तिच्या कुटुंबियांनी पोलिसांकडे दाखल केली होती. दरम्यान, शनिवारी सकाळी उरण - पनवेल मार्गावर यशश्रीचा मृतदेह आढळला. यशश्रीच्या बॉयफ्रेंडने हत्या केल्याचा संशय व्यक्त करण्यात आला आहे. हत्या करणाऱ्या आरोपीने यशश्रीच्या शरीरावर चाकूने वार केले आहेत. प्रेमप्रकरणातून ही हत्या झाली आहे.

पोलिसांना शनिवारी पहाटे उरण - पनवेल मार्गावर झाडीमध्ये एक मृतदेह सापडल्याची माहिती मिळाली. फोनवरुन नागरिकांनी ही माहिती पोलिसांना दिली. या प्रकरणी पोलिसांनी गुन्हा दाखल केला आहे. आरोपीचा शोध सुरु आहे. यशश्रीच्या आईने त्यांच्या मुलीची हत्या करणारा आरोपी हा एका विशिष्ट समाजातला असल्याचं म्हटलं आहे. पोलिसांनी लवकरात लवकर आरोपीला अटक करावी आणि फाशीची शिक्षा द्यावी, अशी मागणी यशश्रीच्या कुटुंबियांनी केली आहे. पोलिसांनी या प्रकरणाच्या तपासासाठी 5 टीम्स तयार केल्या आहेत. उरणचे आमदार महेश बालदी यांनीदेखील आरोपीला लवकरात लवकर अटक करण्याची मागणी केली आहे.

या प्रकरणामुळे उरण तालुक्यात खळबळ उडाली आहे. तरुण मुलीचा जीव गेल्याने शिंदे कुटुंबियांवर दुःखाचा डोंगर कोसळला आहे. तरुणीची हत्या करुन पळून जाणाऱ्या आरोपीचा शोध कधी लागणार, असा प्रश्न सध्या सगळ्यांना पडला आहे. उरण पोलीस ठाण्याचे वरीष्ठ पोलीस निरीक्षक राजेंद्र कोते पाटील यांनी आरोपीला लवकरच ताब्यात घेऊ, असं सांगितलं आहे.

दरम्यान या घटनेमुळे महिला सुरक्षेचा प्रश्न पुन्हा ऐरणीवर आला आहे. उरण तालुक्यात या घटनेमुळे संतप्त वातावरण बघायला मिळत आहे. एका तरुणीची निर्दयीपणे हत्या करुन तिचा मृतदेह फेकून आरोपी पळून गेला आहे. पोलिसांच्या तावडीत हा आरोपी कधी सापडणार, हे पाहावे लागेल.

2024-07-27T13:43:16Z dg43tfdfdgfd