MHADA LOTTERY 2024 DATE: या दिवशी निघणार म्हाडाच्या 2030 घरांसाठी सोडत, संपूर्ण वेळापत्रक जाहीर

Mhada Mumbai Lottery 2024 Result News: महाराष्ट्र गृहनिर्माण व क्षेत्रविकास प्राधिकरणाच्या मुंबई मंडळाने मुंबईतील 2030 घरांसाठीच्या लॉटरीसाठी अर्ज केलेल्या नागरिकांसाठी आनंदाची बातमी आहे. म्हाडाने आता म्हाडाने सोडतीची तारीख जाहीर केली आहे. पुढील महिन्यात 8 ऑक्टोबर रोजी मुंबई येथील यशवंतराव चव्हाण प्रतिष्ठानमध्ये ही सोडत काढण्यात येणार आहे. 8 ऑक्टोबर रोजी सकाळी 10.30 वाजता यशवंतराव चव्हाण प्रतिष्ठान सभागृहात सोडतीचा निकाल जाहीर होणार आहे.

म्हाडाच्या मुंबई मंडळाने गेल्या महिन्यात 8 ऑगस्ट रोजी 2030 सदनिकांच्या विक्रीसाठी लॉटरी जाहीर केली होती. सुरुवातीला अर्ज करण्यासाठी शेवटची मुदत 4 सप्टेंबर ठेवण्यात आली होती, तसेच सोडतीसाठी 13 सप्टेंबर ही तारीख निश्चित करण्यात आली होती. परंतु नंतर त्यात बदल करण्यात आला. नागरिकांना अर्ज करण्यासाठीची मुदत 19 सप्टेंबरपर्यंत वाढवण्यात आली. परंतु पात्र अर्जदारांची प्रारूप यादी, अंतिम यादी आणि सोडतीचा निकाल कधी जाहीर होणार हे जाहीर करण्यात आले नव्हते. आता म्हाडाने हे वेळापत्रक देखील जाहीर केले आहे.

8 ऑक्टोबर रोजी निकाल जाहीर होणार

अर्ज प्रक्रिया 19 सप्टेंबर रोजी पूर्ण होईल. त्यानंतर अर्जांची छाननी करून 27 सप्टेंबर रोजी सायंकाळी 6 वाजता पात्र अर्जांची प्रारूप यादी प्रसिद्ध केली जाईल. यानंतर 3 ऑक्टोबर रोजी सायंकाळी 6 वाजता म्हाडाच्या अधिकृत संकेतस्थळावर पात्र अर्जदारांची अंतिम यादी प्रसिद्ध केली जाईल. ही सर्व प्रक्रिया पूर्ण झाल्यानंतर 8 ऑक्टोबर रोजी सोडत जाहीर केली जाणार आहे. आहे. 8 ऑक्टोबर रोजी सकाळी 10.30 वाजता मुंबईतील यशवंतराव चव्हाण प्रतिष्ठान येथील सभागृहात सोडतीचा निकाल जाहीर केला जाणार आहे.

लॉटरीमध्ये मुंबईतील या घरांचा समावेश

म्हाडाच्या या लॉटरीमध्ये मुंबईतील गोरेगाव पश्चिम, अँटॉप हिल-वडाळा, कोपरी पवई, कन्नमवार नगर-विक्रोळी, शिवधाम कॉम्प्लेक्स-मालाड, दादर, लोअर परळ, पवईसह मुंबईच्या विविध भागातील गृहनिर्माण प्रकल्पांमधील 2030 घरांचा समावेश आहे. या लॉटरीसाठी ज्यांनी अद्याप अर्ज केलेला नाही, त्यांच्यासाठी अजूनही संधी आहे. अर्ज करण्याची प्रक्रिया 19 सप्टेंबरपर्यंत सुरू राहणार आहे. विशेष म्हणजे म्हाडाने या लॉटरीतील काही घरांच्या किमतीत कपात केली आहे. खासगी विकासकांनी निर्माण केलेल्या 370 फ्लॅट्सच्या किंमती 10 ते 25 टक्क्यांनी कमी करण्याचा निर्णय म्हाडाने घेतला आहे. यामुळे लॉटरीसाठी अर्ज केलेल्या सर्वसामान्य नागरिकांना दिलासा मिळाला आहे.

2024-09-07T06:06:57Z dg43tfdfdgfd