NEET EXAM: 'हा तर 23 लाख विद्यार्थ्यांचा विश्वासघात', NEET चा पेपर फुटल्याप्रकरणी राहुल गांधींची सरकारवर टीका

Rahul Gandhi: संपूर्ण देशात 5 मे 2024 ला NEET UG 2024 चे परीक्षेचे आयोजन करण्यात आले होते. मात्र या परीक्षेचा पेपर फुटल्याचा बातमी समोर आली आहे. बिहारमध्ये NEET UG 2024 चा पेपर फुटल्याची घटना घडली आहे. मात्र NTA ने हे वृत्त नाकारले आहे.

याप्रकरणी पाटणा पोलिसांनी काही आरोपींविरुद्ध FIR दाखल केला आहे. तसेच पोलिसांनी काही लोकांना ताब्यातही घेतले आहे. या प्रकरणी 8 लोकांची चौकशी केली जात आहे. मात्र तर NTA ने बिहारमध्ये हा पेपर फुटल्याचे वृत्त नाकारले आहे.

राजस्थानमधील सवाई माधोपूर येथील मुलींच्या उच्च माध्यमिक आदर्श विद्या मंदिर, मॅनटाउन परीक्षा केंद्रावरील पर्यवेक्षकांनी प्रश्नपत्रिका चुकीच्या पद्धतीने वाटल्याचे समोर आले आहे. विद्यार्थ्यांनीही याबाबत आवाज उठवला होता. या प्रकरणाबाबत, NEET ने स्वतः एक पत्रक जारी करून म्हटले की, सवाई माधोपूरमध्ये प्रश्नपत्रिका चुकीच्या पद्धतीने वाटण्यात आली होती. त्यामुळे परीक्षार्थी संतप्त झाले आणि परीक्षा संपल्यानंतर पर्यवेक्षकांनी थांबवूनही हे विद्यार्थी परीक्षेची प्रश्नपत्रिका घेऊन परीक्षा केंद्रातून बाहेर पडले होते.

या सर्व प्रकरणावर कॉंग्रेसचे नेते राहुल गांधी यांनी ट्विट करत भाष्य केले आहे. राहुल यांनी म्हटले की, NEET परीक्षेचा पेपर फुटल्याची बातमी म्हणजे 23 लाखांहून अधिक विद्यार्थी आणि त्यांच्या कुटुंबीयांच्या स्वप्नांचा विश्वासघात आहे. बारावी पास होऊन कॉलेजमध्ये प्रवेश मिळवण्याचे स्वप्न पाहणारे विद्यार्थी असोत किंवा सरकारी नोकरीसाठी धडपडणारे होतकरू तरुण असोत, मोदी सरकार सर्वांसाठीच शापीत ठरले आहे.'

पुढे बोलताना राहुल गांधी म्हणाले की, 'गेली 10 वर्षे भाजप सरकारच्या नाकर्तेपणाची किंमत आपले भविष्य उद्ध्वस्त करून चुकवत असलेल्या तरुण आणि त्याच्या कुटुंबीयांना आता समजले आहे की, सरकारमध्ये असताना बोलणे आणि सरकार चालवणे यात फरक आहे. मात्र कडक कायदे करून तरुणांना पेपरफुटीपासून मुक्त करण्याचा संकल्प काँग्रेसने केला आहे. विद्यार्थ्यांसाठी पारदर्शक वातावरण तयार करणे ही आमची हमी आहे.'

दरम्यान, NEET UG 2024 परीक्षेसाठी एकूण 23 लाख 81 हजार 833 उमेदवारांनी अर्ज केले आहेत. यात मुलांची संख्या 10 लाखांहून अधिक आहे. तर मुलींची संख्या 13 लाखांहून अधिक आहे. यासाठी NEET UG 2024 त्याच्या नियोजित तारखेला 5 मे 2024 रोजी घेण्यात आली आहे. मात्र आता ही परीक्षा वादात सापडली आहे.

2024-05-06T10:10:37Z dg43tfdfdgfd