महायुतीचा संपेना 'खेळ', उमेदवारीचा बसेना मेळ! वेळ अन् खर्चाच्या विचाराने इच्छुक चलबिचल

म. टा. विशेष प्रतिनिधी, नाशिक : नाशिक लोकसभा मतदारसंघात महाविकास आघाडीचे शिवसेना ठाकरे गटाचे उमेदवार पराग ऊर्फ राजाभाऊ वाजे यांच्या प्रचाराच्या दोन फेऱ्या पूर्ण झालेल्या आहेत. अशा स्थितीत महायुतीकडून उमेदवार निश्चितीचा घोळ अद्यापही मिटलेला नाही. कमी वेळेत सर्व मतदारांपर्यंत पोहचणे अशक्य असल्याने आणि पैसे व श्रम खर्च करूनही निवडून येण्याची शाश्वती वाटत नसल्याने भाजपसह शिंदेसेनेतील मातब्बर इच्छुक माघारीच्या मानसिकतेत गेले आहेत. त्यामुळे हेमंत गोडसे हेच उमेदवारीच्या शर्यतीत कायम राहिले आहेत.

नाशिक लोकसभा निवडणुकीच्या घोषणेला गुरुवारी चाळीस दिवस पूर्ण होत आहेत, तर उद्या (दि.२६) पासून अर्ज दाखल करण्यासाठीची प्रक्रिया सुरू होत असतानाही महायुतीचा उमेदवार निश्चित होऊ शकलेला नाही. मतदारसंघात महायुतीचे पाच आमदार, भाजपची संघटनात्मक ताकद आणि आर्थिक सक्षमतेच्या कसोटीवर महायुतीच्या तीनही पक्षांकडे एक से बढकर एक सक्षम उमेदवार असतानाही उमेदवारीचा घोळ मिटू शकलेला नाही. विरोधकांचा उमेदवार प्रचारात कितीतरी पुढे गेल्याचे निरीक्षण नोंदवत छगन भुजबळ निवडणुकीच्या रिंगणातून बाहेर पडले. भुजबळांनी आपल्या निर्णयामागील हतबलता प्रत्यक्षरीत्या व्यक्त करतानाच, येणाऱ्या उमेदवारालाही एकापरीने इशारा दिला. या घटनेलाही आठवडा लोटला तरीही उमेदवारीचा निर्णय घेतला जात नसल्याने महायुतीचे कार्यकर्ते सैरभैर झाले आहेत.

शिंदे सेनेत हेमंत गोडसे यांच्यासह जिल्हाप्रमुख अजय बोरस्ते, ठाकरे गटाचे विजय करंजकर यांचेही नाव चर्चेत असले तरी उमेदवारीच्या शर्यतीतून ही दोन्ही नावे मागे पडली आहेत. करंजकर यांच्यावर शिंदे सेनेचा भरवसा नाही. त्यामुळे शिंदे सेनेत आता गोडसेंना बाय मिळाल्याचे चित्र आहे. मुख्य स्पर्धक बाहेर पडले तरी शिंदे सेनेने उमेदवार जाहीर न करता ‘थांबा अन् वाट पहा’चे धोरण स्वीकारलेले दिसते. इतके दिवस सुरू असलेले हेच धोरण आता महायुतीच्या अंगलट येणार असल्याची चर्चा सुरू झाली आहे.

- नाशिक लोकसभा मतदारसंघात प्रत्येकी तीन शहरी व ग्रामीण विधानसभा मतदारसंघ

- सर्व मिळून सुमारे ५७० पेक्षा अधिक गावे

- अल्प वेळेत मतदारांपर्यंत पोहचणे जवळपास अशक्यप्राय, यामुळे माघारीची मानसिकता

अशाच अधिक बातम्या वाचण्यासाठी भेट द्या महाराष्ट्र टाइम्सला. ताज्या बातम्या, शहर, देश, अर्थ, क्रीडा, भविष्य आणि लाइफस्टाईल संदर्भातील सर्व बातम्यांचे अपडेट्स मिळवा. व्हिडिओ पाहण्यासाठी मराठी TimesXP ला भेट द्या.

2024-04-25T00:34:47Z dg43tfdfdgfd